الذكاء الإصطناعي - يرعب العالم

 مسيرة البني آدم ده مرعبة بشكل مزعج والله، مبيحطش إيده في حاجة إلا وتقلب الدنيا. تعرف قارون اللي كان من بني إسرائيل وبيحول التراب دهب لغاية ما بقى أغنى واحد في قوم سيدنا موسى؟ ... سوتسكيفر ده زي قارون كده (وهو إسرائيلي بالمناسبة فمروحناش بعيد).

تسعين في الميه من إجرام الـ AI وسيناريوهات الرعب اللي في العالم تجاه تطوراته هينتهوا بلا رجعة لو البني آدم ده اختفى من المجال ... المفروض كل مناشدات وقف أبحاث الذكاء الصناعي اللي بتتحدف يمين وشمال تركز عالمطلب الوحيد ده: طلعوا إيليا سوتسكيفر معاش وادفعوله كام مليون كل سنة (أو كل شهر عادي) مقابل إنه يبطل يحطّ إيده في أي حاجة لغاية ما يموت. تلاتين سنة هدوء ممكن يعيشهم الذكاء الصناعي ومش بعيد نرجع للـ AI winter تاني لو البني آدم ده طلع معاش أو غير الكارير بتاعه.

من ساعة ما كان طالب دكتوراه مع جيفري هينتون (اللي استقال من جوجل النهارده عشان خايف من تطورات ابحاث الذكاء الصناعي عالبشرية، هنتون ده كبيرهم اللي علّمهم السحر، أهو دا نفسه خايف دلوقت من المستقبل زي الملايين) وهو بيعمل معجزات. هو دا اللي عمل لأبحاث هنتون قيمة لما كان شغال معاه في تورونتو واستعمل الجرافيكس كارد لأول مرة عشان يمرن بيها النيورال نتوركس. وهو اللي افتتح ثورة المعالجة النصوصية باستعمال الRNNs. ومن الباحثين الرئيسيين اللي عملوا الألفا جو بتاع جوجل ... وهو حاليا المشرف على كل أبحاث OpenAI واللي خلاهم يعرفوا يعملوا التشات جي بي تي (بالاضافة للمودلز اللي قبليه في نفس المجال).